Magacyada Wasiirro Isha Dabaya OO Salabe U Qaatay Dhaxal-wareejinta Ammaanadii Qaranka, Shaqadii Qarankana Ka Door-biday Hurinta Khilaaf Gacan Ku Rimis Ah

Magacyada Wasiirro Isha Dabaya OO Salabe U Qaatay Dhaxal-wareejinta Ammaanadii Qaranka, Shaqadii Qarankana Ka Door-biday Hurinta Khilaaf Gacan Ku Rimis Ah

Waxa Mus-dambeed u ah oo Talada Kasoo Qaataan Sheekh Xaallad Gagab Ah Ku Jira Oo U Cumaamadan Han Madaxnimo

Hargeysa:(Hubaal)-Wasiirro tiro badan oo katirsan Xukuumadda Madaxweyne Siilaanyo, ku Hawllan mijo-xaabinta iyo madaluffinta Xisbiga ay katirsan yihiin ee Kulmiye, kuwaas oo madaxweynahana u muujiya inay kula midaysan yihiin Horumarka uu doonayo inuu dalka Ku hoggaamiyo.

Xubnahan katirsan Golaha Wasiirrada, ayaa muddooyinkii ugu dambeeyey u ban baxay kala daadinta Xisbiga Talada haya oo dhawaan u ballansan shirweynihiisii shanaad ee Golaha dhexe, waxana iyagoo ka talo qaadanaya Wasiirkii hore ee Wasaaradda Maaliyadda Md Cabdicasiis Maxamed Samaale ay go’aansadeen inay  burburinta Xisbiga Kulmiye Door weyn ka qaataan xilli ay xilalkii Qaranka ugu muhiimsanaa u hayaan Madaxweyne Siilaanyo oo isagu ahaa Aasaasihii dhidibada u taagan Xisbigan.

·  Wasiiru-dawlaha wasaaradda madaxtooyada Md. Maxamed Muuse Abees

·  Wasiirka wasaaradda Hawlaha Guud iyo Guryeynta  Md.  Cabdirisaaq Khaliif Axmed

·  Wasiir ku xigeenka wasaaradda hawlaha guud iyo guriyeynta Md. Cali Cabdi Saa’iq

·  Wasiirka Wasaaradda Shaqada iyo arrimaha Bulshada Dr. Cabdi Aw Daahir Cali

·  Wasiir ku xigeenka wasaaradda shaqada iyo arrimaha Bulshada Md. Cabdiwaaxid Cabdiraxmaan

·  Wasiirka wasaaradda Dib u dejinta Md. Cali Saciid Reygal

1. Wasiir ku xigeenka wasaaradda dib u dejinta Marwo Nimco Xuseen Qawedhan
2. Wasiirka wasaaradda Boosaha iyo Isgaadhsiinta Md. Maxamed Jaamac Abgaal [Sakaaro]
3. Wasiirka wasaaradda Waxbarashada iyo tacliinta sare Md. Faarax Cilmi Maxamuud (Geedoole)
4. Wasiir ku xigeenka wasaaradda Ganacsiga iyo Maalgashiga Caalamiga Ah Md. Bashiir Cabdi Xariir
5. Wasiirka Wasaarada Caddaaladda Md. Xuseen axmed Caydiid

Xubnahan Wasiirrada ah oo madaxweynaha tusa weji wada-shaqayneed iyo daacadnimo, ayaa muddooyinkii ugu dambeeyey lugaha kula jirey khilaaf Gacan-ku-rimis ah oo Xisbiga Kulmiye garabyo is haya looga dhigayo, waxana iyagoo Mudane Samaale Talooyinkiisa raacaya ay Geed dheer iyo mid gaabanba u saaran yihiin sidii uu xisbigu u burburi lahaa, isla-markaana Tacabkii madaxweyne Siilaanyo oo Muddada dheer soo jirey looga dhigi lahaa Hal bacaad lagu lisay.

Wasiirradan oo dhammaantood ka arradan yihiin Han madaxtinimo, isla-markaana xambaarsan Fikir iyo aragtiyo siyaasiyiin kale oo aan iyaga ahayn, ayaa shirar-doceedyo ma dhalays ah Hutellada waaweyn ee Caasimadda isaga dab qaadayey ayaamihii ugu dambeeyey, waxana wali aan u suurtogelin shirqoollo tiro badan oo ay Taariikhda suuban ee Madaxweynaha qaranka ku wiiqayaan.

Wadaadka Talada Wasiirradani ku Hawlgalaan soo jaan gooya oo ah Wasiirkii Hore ee Maaliyadda Md Cabdicasiis Maxamed Samaale, ahna Musharrax Madaxweyne oo Xisbiga Kulmiye dhexdiisa ah, Ayaan marnaba ka damqan qoonta iyo taariikh xumada lagu shaambadaynayo taxanihii waxqabad iyo kii horumarineed ee Madaxweyne Siilaanyo oo ay wakhti badan siyaasadda saaxiib isku dhaw kusoo wada ahaayeen, waxase kaliya u cad inay gaadhaan Hankooda ah in Xisbiga ay Burburinayaan Haddii aan loo yeelin Dalabyo aan cilmi ku dhisnayn oo ay Badka hore usoo dhigeen.

Maanta oo sabti ah ayaa Kooxdan uu hoggaamiyo Ex. Wasiir Samaale waxa ay Hutel Mansoor ku leeyiin Qado-sharaf loo qabanayo xubno Bulshada ka mid ah oo tiradooda lagu sheegay 200-xubnood, iyadoo casuumaddaasna uu sameeyey Cabdicasiis Samaale, waxana Dadka lala  kulmi doona lagu adkayn doonaa inay qabtooda ka qaataan Burburinta Xisbiga Kulmiye, maadaama ay ka dhex waayeen Wixii ay ka filayeen oo taageero ahayd.

Wasiirrada shirqoolka Kulmiye ku Hawllan oo  aan ka qarsanayn Madaxweynihii shaqada u igmaday, isla-markaana tacabkiisa geliyey Xisbiga  ay baabi’inayaan, ayaa Yoolkoodu yahay in dhibaatadooda la wada arko, intaas kadibna ladqabo loogu oggolaado shuruudaha jaban ee ay lasoo shir tageen oo haatan diidmo xoogan kala kulmay Madaxweyne-ku-xigeenka Somaliland oo haatan Halkii madaxweynaha fadhiya.

Fidmada ay Kooxda Tacabka Madaxweynaha kusoo duushay Wadaan, ayaa sidoo kale wax aka warqaba shacabka samaha jecel ee Dimuqraaddiyada hadhsada, waxase ay madaxweynaha ka filayaan inuu tallaabo ka qaado marka uu soo dhamaysto safarkiisa dibadda, maadaama oo ay  mijo-xaabinayaan dedaalkiisii dheeraa ee taariikhiga ahaa.

Ma aha wax taariikhda Somaliland iyo midda umadda Dimuqraaddiyada ku caano maasha soo martay in Wasiirro xilal hayaa si cad ugu badheedhaan Duminta iyo kala dhantaalidda Tacabka Madaweynihii xilka u igmaday oo Xay ah, balse waa wax haatan cusub oo u baahan in la raadiyo xalkii lagu furdaamin lahaa iyo daawadii lagula dagaallami lahaa Cudurkan Heeryocunnimada ah.

Dhinaca kale waxa si habsami ah u socda Hawlaha shirweynaha Golaha dhexe ee Xisbiga Kulmiye, waxana awooddiisa distoorka Xisbigu siiyey ku maamulaya Guddoomiyaha Xisbiga Md Muuse Biixi Cabdi, halka kooxdani wali dibad-wareeg ku yihiin Huteelada Waaweyn ee Caasimadda.

www.hajicami.blogspot.com
E-mail; samater2013@gmail.com

Xarunta Dhexe ee Xisbiga Kulmiye Oo Bilawday Bixinta Kaadhadhka Xubnaha Golaha Dhexe + Maxamed Kaahin Oo Ka Hadlay

Xarunta Dhexe ee Xisbiga Kulmiye Oo Bilawday Bixinta Kaadhadhka Xubnaha Golaha Dhexe + Maxamed Kaahin Oo Ka Hadlay.

Hargeysa – Guddoomiye Ku xigeenka Koowaad ee Kulmiye Mujaahid Maxamed Kaahin Axmed ayaa sheegay in maanta si rasmi ah uu u bilaabmay bixinta kaadhadhka xubnaha Golaha dhexe ee uu dhawaan shirku u furmi doono.In kasta oo uu jiro Khilaaf ka dhashay qaabka loo maaraynayo qaybinta kaadhadhka xubnaha golaha dhexe, hadana guddoomiye ku xigeenka Kulmiye ayaa warbaahinta u sheegay in ay qaybinayaan kaadhadhka waxaanu yidhi “Saaka Oo sabti ah xarunta xisbiga waxa ka bilaabmay samayntii kaadhadhka xubnaha Golaha Dhexe ee Kulmiye ee Bisha November 10-da ka qayb galaya shirka, in kasta oo ay dadku siyaabo kala duwan u dhigeen, waxa keliya ee la samaynayaa waxa weeyaan sida laga war hayo marka kasta oo shir la qabanayo waxa dadka shirka ka qayb galaya loo sameeyaa aqoonsi, waxa keliya ee iminka la samaynayaa waxa weeyaan xubnaha golaha dhexe oo liiskoodu halkan yaalo in loo sameeyo kaadhkii aqoonsiga xubinta golaha dhexe uu ku galayo shirka bisha tobankeeda.

Liiskan Golaha dhexe berigii dhaweyto xoogaa buuq ah baa ka dhashay, waa tii guurtidu arrintayada soo dhex gashay .

Liiskayaga Golaha Dhexe waxa saxeexay guddoomiyihii shirka golaha dhexe oo cadami ah iyo lix xubnood oo la waday, waxa uu yaalaa liiskaasi maxakamada sare ee Somaliland, waxa kale oo uu yaalaa komishanka xafiiska gudida diiwaan gelinta ururada iyo asxaabta, hadii loo baahdo waxa aanu ka codsan doonaa hay’adaha dastuuriga ahi in ay shirkayaga goob joog ka noqdaan” ayuu yidhi

www.hajicami.blogspot.com

E-mail: Samater2013@gmail.com

Fb:Abdiasiis jama Haji Cami

Hargeisa Somaliland

Astaanii British Somaliland 1950.

Astaanii British Somaliland 1950.

Halkan waxaynu kaga hadleynaa Astaantii Somaliland uu Ingiriisku u sameeyay 18 December 1950.. Astaantan sidaa aad aragtaan way ka duwan tahay, tii Talyaanigu u sameeyay Soomaaliyadii uu gumeysan jiray. Waayo Ingiriisku Caadada iyo Diinta iyo Dhaqanka Ummada Somaliland ayuu Astaantan ku saleeyay.. Ee Sidii Talyaaniga,azzurri(Buluugley) iyo (Stella d’Italia). Kumuu salayn.
Sharaxa Astaantan.
1. Astaantan Xaga ugu sareeysa waxaad ku aragtaan Xayawaanka Goodirka la yidhaahdo oo dhulka Somaliland ka buuxi jiray Caana ay ku ahayd.
2. Waxaa goodirka ka hooseeya, waa labba Warran iyo Gaashaan, kuwaas oo Tilmaan u ah, Geesinimadii iyo Dagaal-yahannimadii Ummada Somaliland.
3. Gaashaanka iyo Labbada warran, waxaa ka hooseeya, labba Sawir, ka bidix Waa Baytkii illaahay oo ah Masaajid, taas oo Tilmaan u ah in Ummada Somaliland ay ummad Muslim ah ay ahayd, Ingiriisna arinkaas wuu ogsoonaa, sidaas ayuuu Masaajidka u raaciyay. Waxaa dhinaca midig Masaajidka ka xigaana waa Dooni badda Cas dhex maraysa, taas oo iyana tilmaan u ah Ganacsigii iyo xidhiidhkii badda ee ay ummada Somaliland,, ummadaha kale la laahayeen sida Caddantii uu Ingiriisku gumeysan jiray. Doonida waxa ka hooseeyaana waa Anchor, ama Baroosinka ay dhulka ku xidhato.
Haddaba Astaamahan iyo taariikhahan aynu ka sheekeenaynaa maaha inaynu isku colaad sanno, waa taariikh ay Ummada Somaliland iyo ta Somaliyaba ay soo mareen, waana wax qoran oo raad-raac leh, oo aan been iyo mala awaal toona geli karin.. Ummaduna xaq ayay u leedahay inay ogaadaan waxani halkay ka yimaadeen iyo siday ku yimaadeen iyo cida sameyseyba. Qofkii haya Taariikho ka duwan, waxan aynu qoraynaa, wuu soo bandhigi karaa ummadana wuu la wadaagi karaa, Cadaymaheedana wuu soo raacin karaa.




Suleyman Yusufdhakhtar.
www.hajicami.blogspot.com
E-mail: Samater2013@gmail.com
Fb: Abdiasiis Jama Haji Cami
Hargeisa Somaliland