Kulan Dhoollatus Ah Oo Ay Xubnaha Beellaha HARTI Ugu Jira Golaha Dhexe Ee KULMIYE Ku Yeesheen Hargeysa Iyo Mawqif Ay Cuddudooda Ugu Hiilliyeeen Guddoomiye Muse Bihi.

Kulan Dhoollatus Ah Oo Ay  Xubnaha Beellaha HARTI Ugu Jira Golaha Dhexe Ee KULMIYE Ku Yeesheen Hargeysa Iyo Mawqif Ay Cuddudooda Ugu Hiilliyeeen Guddoomiye Muse Bihi.

  

Hargeysa (Hubaal)- Kulan xubnaha beellaha Harti (Dhul-bahante iyo Warsengali) ugu jira golaha dhexe ee xisbiga KULMIYE ku yeesheen magaalada Hargeysa ayaa ay  dhoolatus ku muujiyeen mawqifkooda ku wajahan musharraxa madaxweyne ee ay codkooda iyo cududooda ku taageeri doonaan marka uu qabsoomo shirka golaha dhexe ee xisbigaasi, oo la quudarraynayo in uu horraanta bisha soo socota ka qabsoomo magaalada Hargeysa. Aqlabiyadda ergooyinka Beellaha Harti ugu jira golaha dhexe ee xisbiga KULMIYE ayaa Kulan Kulan isugu jira shaqo iyo  is xog waraysi oo ay Maanta ku yeesheen Hotelka Lake Asal ee magaalada Hargeysa, kana qayb galeen  soddon ergay oo ka tirsan golaha dhexe oo isugu jira wasiirro, xildhibaanno, maareeyayaal iyo agaasimayaal hay’ado dawladda ka mid ah madax ka ah iyo weliba siyaasiyiin miisaan culus, aqoonyahan iyo waxgarad kale oo kasoo jeedda Beelahaasi  waxa ay si midaysan isugu raaceen in ay hiil iyo hooba la garab taagan yihiin Guddoomiyaha Xisbigaasi Md, Muuse Biixi Cabdi Oo isagu tartan ugu jira musharraxnimada Madaxweynaha ee shirka golaha dhexe. Kulankaas oo ahaa mid warbaahintu dibad joog ka ahayd marka laga reebo sawirro guud oo madasha laga qaaday, balse sida xubno ka qaybgalay xaqiijiyeen,. Waxa  madashaasi magacyadooda laga xaadiriyey  magacyada soddon xubnood oo kulanka goob joog ka ahaa, kuwaasi oo ka midaysnaa ajandaha shirkooda iyo taageerada musharrax Muuse Biixi.

Warku intaa ku daray in dhinacyadu isku xog-waraysteen iskuna raaceen dhammaantood  in  ay ka go’an tahay taageerrida iyo inay dhisaan murrashaxnimada Muuse Biixi Cabdi ee xisbiga KULMIYE gudihiisa Madaxweynaha Axmed Siilaanyo kadib, iyadoo halkaasi la isku waydaarsaday hugo-tusaalayn taariikh ku salaysan iyo dardaaran la is faray sidii looga midho-dhalin lahaa in doorashada Guddoomiye Muuse ee murrashaxnimada madaxweynenimo ee tartanka shirka Golaha Dhexe ee xisbiga.

Xildhibaan Cabdiqaadir Maxamed Xasan (Indho) oo isagu warbaahinta lahadlay markii kulanka laga soo dareeray ayaa tafaasiil ka bixiyey nuxurka uu daarnaa iyo waxyaabihii laga wada hadlay “Halkan waxaa ku qadaynaayey oo kulan ku lahaa xubanaha Golaha dhexe ee beesha Harti, ee Warasangali iyo Dhulbahante ugu jira Xisbiga KULMIYE, inta ugu mudan  ee codka lahayd 30 xubnood oo golaha dhexe ah, Wasiirradii, Xildhibaanadii, Agaasimayaal Guud, cid naga maqnayd ma jirto, waxaanu isugu nimid in aanu muujino taageeradda aanu u hayno, Murashaxnimada Jagada Madaxweynenimo ee Gudoomiye Muuse Biixi Cabdi.”  Sidaa ayuu yidhi Md. Indho, waxaanu intaaku daray  “ Maanta waxaanu halkan ka muujinaynaa in codkayaga muruqayaga iyo foodkayaga uu halkaa maro, oo ay sidaa isku raacsan yihiin Dhamaan xubnaha Beesha Harti ee Xisbiga KULMIYE.” Ayuu yidhi Xildhibaan Indho-indho.

Liiska Xubnaha Golaha dhaxe ee Beesha Warsangali  ee Kulankaasi joogay

1. Cali Jaamac Faarax (Buureed) Wasiirka Kaluumaysiga
2. Cabdisalaan Maxamed Xasan. Wasiiru dawlaha W/ Biyaha
3. Axmed Maxamuud Nuur. Wasiir ku xigeenka Deegaanka.
4. Xil. Cali Maxamed Aadan (C. Bare)
5. Xil. Cabdiqaadir Jaamac Xaamud
6. . Sul, Muuse Jaamac Dalaf
7. Cabdilaahi Maxamuud Suldaan Cabdisalaan
8. Maxamed Abshir
9. Ibraahim Ducaale Cawke
10. Axmed Ismaciil Cali (Guray)
11. Sahal Maxamed Jaamac

Liiska Xubnaha Golaha dhaxe ee Beesha Dhulbahante ee Kulankaasi joogay

1. Baashe Cali Jaamac. Wasiirka Biyaha
2. Xil. Maxamed Axmed Maxamuud (Dhakool)
3. Aadan Cabdilaahi Cabdale. Agaasimaha W/ Diinta iyo awqaafta
4. Xil. Gar. Maxamed Jaamac
5. Xil. Cabdi Xaaji Hirad
6. Nadiifo Maxamed Colujoog
7. Jaamac Dheeg Cartan
8. Axmed Maxamed Caraale
9. Axmed Cabdilaahi Dhagool
10. Axmed Maxamed Caraale (Daadeex)
11. Cabdilaahi Maxamuud Guray
12. Faarax Cali Ibraahim
13. Ismaaciil Cali Ibraahim Gaas.

www.Hajicami.Blogspot.com

E-mail: Samater2013@gmail.com

Skype: Abdiasiis Jama Haji Cami

Fb: Abdiasiis Jama Haji Cami

Hargeisa Somaliland

”Sidee baan toban shaqo u abuuraa?”

Shirkii horumarinta dhallinyarada iyo haweenka Afrika ee Nairobi ku qabsoomay waxa lagaga hadlayay in wax wada qabsiga iyo unkidda ganacsiyadu ay yihiin arrimaha lagaga bixi karo shaqo la’aanta baahsan ee haysata dhallinyaradda Afrika. Waxaa laga dooday in lacagta ugu badan ee maal gelin lagu samayn karaa ay tahay, ta ay bulshadu isku darsato. Ka fikir immisa dhallinyar ah ayaad taqaan oo aad ka heli karto $100 ama $200? haddii ay isku tagaan 100 dhallinyar ah oo midkii ba haysto $200 hantidoodu waxay noqonaysaa $20,000 bishii, miyaanay bilaabi Karin ganacsi meel dhexaad ka ah dalkeenna Somaliland? haddii shuruucda wax isku darsi iyo heshiisyo cad la galo – is-aaminaad iyo wax-wada-qabsina loo guntado. Eeg inta shaqada haysa immisaa gaadhi $3000 ah wadata – miyaan ganacsi iyo waxsoosaar loo baddeli Karin oo shaqo abuur u samaysa dhallinyaro badan dhallintaasina u noqonayn ganacsi wax soo saar leh.

Shirkaasi, waxaa guulaheeda lagu soo bandhigay gabadh u dhalatay dalka Uganda oo bilawday olole guulaystay oo ay ugu magac dartay “Hal Doollar Bishii” (ONE DOLLAR A MONTH), gabadhaasi waxay diiwaan galisay haween cadadkoodu yahay HAL MILYAN (1,000,000) oo haween ah oo ku nool Uganda. Waxa heshiis lagu noqday in GABADH waliba ay bishii bixiso $1 (Hal Doollar). oo wadarta guud noqonaysa bishii $1,000,000 (Hal Milyan oo Doollar), Sanadkiina noqonaysa $12,000,000 (Laba iyo toban Milyan oo dollar ka Maraykanka ah). Gabadhaasi waxay isbeddel layaable ku samaysay bulshadii ay ka tirsanayd iyadoo maalgalinno u samaysay haweenkii ururiyay lacagta cadadkaasi le’eg. Hadda waxay raadinaysaa in ay xuquuq caalami ah u hesho ololaheedaasi, oo fikirkeeda iyo xuquuqdeeda ay yeelato meel kasta oo laga bilaabo ololahaas ay ugu magac dartay “HAL DOOLAR BISHII.”

Dhallinyaro, fikirkani waa mid aynu qaadan karno. Inkasta oo uu yahay fikir shakhsi kale leeyahay, haddana waa mid aynu ka faaiidaysan karno oo aynu ka dhex bilaabi karno bulshadeenna dhexdeeda. Caqabado kasta oo innaga hor imanaya na aynu hal-adayg iyo dhiirranaan ku dhaafno.

Intee in le’eg ayaad habeenkii iyo maalintii isticmaashaa oo kharash ah? miyaanad toddobaadkii $1 iska jari Karin si aad uga qayb noqoto olole aad bilawdo oo aad Hal Doollar toddobaadkii kaga ururiso bulshada aad ka tirsan tahay?

Qorshahan waxa aad ka bilaabi kartaa bulshada aad meel wax ku wada barataaan, kooxda aad kubbadda wada ciyaartaan iwm. Si aad wax ugu qabato, miyaanad dhallinyarta aad lacagtaasi ka ururisay maal galin cajiib ah ugu samayn Karin? Ogow buurtu ba waa quruurux isu tagay. Ganacsigu ma laha waddooyin dhow oo markaaba aad ku heli karto macaash. Waddada guusha ganacsigu waa samir iyo sugnaansho.

Ka warran haddii aad arrintan ka bilawdo fasalka goobta waxbarasho ee aad ka tirsan tahay? Deegaan ka aad deggan tahay, kooxda aad wada shaqaysaan ama aad diiwaan galiso dhallinyar badan oo fikir ahaan midaysan? saamayn badan iyo isbeddel muuqda ayaad samayn kartaa. Maxay kuu niyad-jabinanayaan hadallada iyo iska caabinaha kaa hor imanayaa? “Kanna waa uu soo shaqo tegay” iyo dhaliilaha la midka ahi yaanay ku niyad jabin.

Dunidan aynu ku nool nahay ragbaa casrigan soo gaadhsiiyay. Dhallinyartii Nabi Muxamad SCW garab taagnayd yay ahaayeen? Duni Juhalo ah ayay ka dhigeen dunidan qiimaha leh ee aynu ku noolnahay. Diinteenna suubban hormuud dhallinyar ah oo Rasuulkeenna Muxamed SCW garab taagnayd ayaa ina soo gaadhsiiyay, kaalinteeda in aynu qaadano sow ma ahan. Maxaynu cid wax uga sugi iyo hay’ado hadba mashaariic maal galineed siinaya kooxo iyaguba marka hore ladnaa? in aynu dhiirrano miyaanay ahayn, oo aynu maskaxdeenna iyo fikirkeenna hawl galinno? Wax waliba cabsi ayuu leeyahay ogowse wax waliba meel ayuu ka bilaabmaa. Noloshu waxay u baahan tahay ku-dhac, dhiirranaan iyo wajihidda waxyaabaha ku cabsi galinaya ee guulaha aad arkayso ka sokeeya– la arkee in aad guul widh-widhiso, noqo hormuud ha lagu daba galeee!

Ugu dambayn waxaynu u baahannahay in aynu fikirkeenna ah “Sidee baan shaqo u helaa” ku beddelno “Sidee baan toban shaqo u abuuuraa”

www.Hajicami.blogspot.com

E-mail: Samater2013@gmail.com

Skype: Abdiasiis47

FB: Abdiasiis Jama Haji Cami

Hargeisa Somaliland

 

Filasho Togan!

 

Bulsho deegaan wada daganayd ayaa la kulan tay abaaro iyo biyo la’aan baahsan oo ay sababeen dib u dhac ku yimi Raxmaadkii Eebe oo aan wakhtigiisii curan . Abaarahaasi waxay sababeen warwar iyo khatar soo wajahda dallagii iyo xoolihii bulshada. Xaaladu markii ay sii xumaatay – waayuhuna ku si adkaadeen bulshadii ayaa imaamkii culimaddu iclaamiyay roob doon iyo Alle (swt) barri Eebe lagaga baryayo in uu raxmaadkiisa u soo dajiyo.
Bulshadii waxay isugu soo baxday barxadii banaanayd ee deegaanka. Imaamkii bulshadu markii uu fuulay mimbarkii uu ka jeedinayay wacdigii iyo khudbadii uu bulshada kula dar-daarmayay wuxuu arkay wiil yar oo 11 sanno jir ah oo farxad iyo rayn rayn ka muuqato wajigiisa agtiisana ay taalo DALLAAYAD kuwa roobka laga qaato ahi.
Imaanka iyo filashada cajiibka ah ee ilmahaasi yar darteed ayuu farxad ilmeeyay Imaamkii. Ma uusan jirin qof kale oo sitay Dallaayad bulshadii madasha isugu timi.
Dhamaan bulshadu waxay goobta u yimaadeen in ay Illaahay waydiistaan roob iyo raxmaad, laakiin, inanka yari wuxu goobta yimi isagoo FILAYA in Illaahay ajiibi doono codsigooda – wuxuu soo qaatay Dallaayadiisii uu wakhtiga Roobka isticmaali jiray.
Si la mid ah sida inankaasi yari uu u diyaarsaday Dalaayadiisii si uu u helo doonistiisii, waa in aynu isku diyaarinaa jawaabta waydiisashadeena Eebbe (swt). Marka Illaahay carabkaagaa waafajiyo in aad wax waydiisato ogow in Illaahay rabbo in uu ku siiyo.
Cumar bin Khadaab Illaahay Raali ha ka ahaadee wuxuu yidhi “Kama warwaro jawaabta ducadayda, waxaanse ka war waraa in aan ducaysto. Waxaan ogahay haddii Ilaahay igu gargaaro in aan ducaysto, in ay jawaabta Eebbe iman doonto”
Tixgalin

www.Hajicami.blogspot.com

E-mail: Samater2013@gmail.com

Skype:Abdiasiis47

FB:Abdiasiis Jam a Haji Cami